港聞

港聞二

下一篇
上一篇

科大拍片講失敗 色盲理學院長:遇挫折變強

【明報專訊】「失敗乃成功之母」呢句話大家耳熟能詳,亦有好多活生生例子,好似科技大學一班師生拍咗幾條短片,講番佢哋嘅失敗經驗,其中科大理學院院長汪揚就透露,佢曾經好想做物理學家,點知入到大學要做一個色盲測試,佢先至發現原來自己係色盲。

做物理學家不果 數學創新天

汪教授早年喺中國科學技術大學取得數學學士學位;及後喺哈佛大學取得博士學位。汪揚話喺內地大學,色盲係唔能夠做物理學家嘅,佢難過到喊足全日,之後鑽研數學,但試過考試考尾二,最終佢成為數學家,仲係創辦科大大數據研究所嘅3名重要成員之一。汪揚鼓勵學生,唔好太在意一時嘅挫折,因為呢啲經歷會令一個人變得更強。

校長史維曾令老師極失望

科大校長史維喺其他人眼中,學術勁之餘又識影相,你以為佢一直係人生贏家?原來佢試過考試肥佬,令到老師失望到直頭唔想同佢講嘢咁滯。史維憶述喺台灣讀小學時,學校每年都要考升級試,佢就肥咗小六升中一個試。佢話如果成日都成功,係唔會體會到成功嘅特別之處,同埋自問盡咗力,失敗亦唔係羞家嘅事。佢鼓勵學生唔好遇到挫折就放棄,要堅持落去。

每年10月13號係國際失敗日(International Day for Failure),係由一班芬蘭大學生喺2010年創立,目的係宣傳勇敢面對失敗嘅信息。科大話拍短片都係想宣傳呢個信息,大家有興趣可以上佢哋網站睇埋其他教授同同學仔嘅分享。

相關字詞﹕科技大學

上 / 下一篇新聞