港聞

港聞二

下一篇
上一篇

首做委會主席 張國鈞:要隨身帶《憲法》

【明報專訊】立法會上星期選出18個事務委員會嘅正副主席,建制派積極培訓新議員接棒做主席,好似民建聯張國鈞(Horace)咁,就身負重任做政制事務委員會主席。

噚日首次開會,Horace主持會議後話比想像中順利,原本預料泛民議員一定會炮轟政府,所以佢已睇定《議事規則》睇吓要點樣可以維持秩序,最終大家跟足程序守規矩。對於首次主持會議後嘅感想,Horace話日後要隨身帶定《憲法》同《基本法》開會,因為呢個會好多問題都同憲制有關。

公務員及資助機構員工事務委員會噚日朝早都第一次開會,新上任做主席嘅新民主同盟范國威(Gary)遲到5分鐘,副主席廖長江更加連影都無,一度令準時嘅議員要等,無幾耐Gary匆匆趕至,同大家講番句唔好意思,就正式開會喇。

建制4人退會 效率好高

建制派早前為咗選正副主席時有足夠人數確保主導權,要求每個建制議員都加入「2+11」,即係財委會轄下兩個小組,以及11個事務委員會。隨着各委員會選完主席,Emily聽聞建制內部噚日有信息,指大家可以退出番「捱義氣」加入嘅委員會,其中人力事務委員會今日先正式開第一次會,但噚日已先後收到廖長江、陳振英、周浩鼎同柯創盛4人通知退出嘅信,退會效率非常高。

相關字詞﹕范國威 張國鈞 郭偉強

上 / 下一篇新聞