港聞

港聞二

下一篇
上一篇

謝偉銓拍片 籲搭電梯勿左行右企

【明報專訊】「握扶手,企定定,唔好喺電梯上行走。」大家出入港鐵站乘搭扶手電梯時,相信都聽過呢句呼籲,但未必個個都會聽話 。立法會建測界議員謝偉銓(Tony)噚日喺facebook上載短片,從專業角度解釋電梯兩邊企人,比喺「左行右企」嘅習慣更理想,佢話除咗令載人效率提高,亦可以令機件無咁易故障。

左企右企繁忙時間可載多幾千人

Tony強調,左行右企會令電梯左邊通道疏落,無辦法用盡空間,造成樽頸擠塞。佢引述英國格林威治大學一項研究,話只有25%受訪者願意行電梯,而倫敦交通局曾喺一個地鐵站測試,發現兩邊都企人嘅話,可以運送多三成乘客,以繁忙時間早上8點半至9點半計算,可以載逾1.6萬人,比左行右企多近4000人。

可令機件無咁易故障

除咗效率問題,Tony話左行右企長遠亦會為電梯帶嚟安全隱患,因為機械運作側重一邊,部分配件會出現偏差,重量唔平衡容易造成機械故障。Tony話電梯兩邊企人可以提高效率、減少意外,建議港鐵同政府多宣傳,除咗喺電梯兩邊印上腳印標誌,提示乘客左邊通道可以企人,亦可以利用影片同廣告示範正確搭電梯方式,改變左行右企呢項錯誤觀念。

相關字詞﹕電梯 謝偉銓

上 / 下一篇新聞