港聞

港聞二

下一篇
上一篇

「我係撐廣東話」 楊局長澄清之旅繼續...

【明報專訊】「用廣東話學中文將來會否長遠?」教育局長楊潤雄𠵱條「疑問句」,再次炒熱廣東話、普通話學中文嘅議題,仲搞到群情洶湧。楊潤雄連日來解畫再解畫,佢噚日上商台節目講施政報告時,第4次澄清當日說法,話自己講廣東話最自然,最舒服,表明「我係撐廣東話」。

楊潤雄話,世界好少地方用廣東話學中文係事實,「會唔會因為咁影響將來成個語文發展?唔知」,就算研究得出「廣學中」無咗優勢,都唔代表要轉;不過,其實局方無做緊相關研究,亦無壓力要做研究。喺香港土生土長嘅楊潤雄又話,母語係廣東話,講廣東話係最自然。主持人再問佢第二自然講英文定普通話?佢話都差唔多。

田北俊:算吧啦,唔好再兜啦

唔知市民對楊潤雄今次表態收唔收貨,不過自由黨榮譽主席田北俊(田少)就喺facebook發帖文,叫局長「算吧啦,唔好再兜啦」,話做官係為市民服務,唔係為咗獻媚,鋪後路去選人大(代表)、做政協。

家長「讚賞」送仔女讀國際學校

楊潤雄早前話自己因為「懶啲揀個簡單方法」,所以送仔女讀國際學校,噚日有家長致電節目「讚賞」佢:「我自己經濟能力做唔到,好羨慕你咁做」;亦有家長同局長講「你個小朋友唔係讀津貼學校,我個小朋友係讀津貼學校」,話「普教中」幾咁影響仔女中文成績。

相關字詞﹕田少 田北俊 普教中 廣東話 楊潤雄

上 / 下一篇新聞