港聞

港聞二

下一篇
上一篇

林鄭戥劉德華唔抵 稱生於同一年代

【明報專訊】特首林鄭月娥喺《施政報告》提出「明日大嶼」計劃,研究喺東大嶼填海約1700公頃,接近全國政協副主席董建華牽頭嘅團結香港基金,提出嘅「強化版東大嶼都會」2200公頃大型人工島計劃。有「民間特首」之稱嘅劉德華早前幫基金短片旁白,支持填海,遭網民批評,林太噚日喺記者會為華仔護航,話留意到有人因此對華仔人身攻擊、侮辱,形容係「非常唔公道」,又敬佩華仔勇於表達意見,順道預祝佢12月演唱會成功。

林太話,自己比公眾早一兩日睇到段短片,睇完「好驚訝」,因為短片嘅用字、概念都同施政報告咁脗合,譬如大家都有「向前行」、「希望」、「啱做就去做」字眼,佢澄清政府同團結香港基金「冇夾過」。

林太話唔知係咪華仔親自寫旁白,但據說華仔認同旁白內容,佢話短片旁白同施政報告字眼不謀而合,可能因為佢同華仔生於同一年代,笑言自己比華仔大幾年,但大家都係出身基層,喺香港騰飛嘅年代受惠於經濟發展,同樣以港人拼搏努力嘅精神去到今日嘅地位。

林太話:「我哋去到呢個年紀,老實講,仲需要為自己做啲咩嘢呢?」佢指大家都關顧下一代,想下一代有機會喺香港發展,而唔係移民。

相關字詞﹕施政報告 林鄭月娥 明日大嶼 填海

上 / 下一篇新聞