港聞

港聞二

下一篇
上一篇

林兆波不滿老婆太忙:以後唔使見你啦?

【明報專訊】特首林鄭月娥噚日發表任內第二份《施政報告》,夜晚出席傳媒論壇時,被問到做咗一年多特首,最大壓力來源喺邊,林太話係來自老公林兆波,因為自己呢年幾無乜時間陪對方,又透露噚日發表演辭後,問老公對施政報告有咩睇法,林兆波話作為市民會覺得報告全面,但「作為你老公就好唔滿意」,因為林太將來好多嘢要執行,會更忙碌,「以後唔使見你啦係咪?」

話雖如此,林兆波其實一直默默支持林太,佢一如去年現身立法會撐場,坐喺樓上公眾席,同一班行政會議成員如陳智思及周松崗有講有笑。當林太開始宣讀報告,林兆波聽得好專注,但就無好似其他行會成員咁戴上耳機聽。

與林太同行嘅未來仲會有一班中學生。政府今年暑假推出「與司局長同行」計劃,30幾名獲選中學生可隨同3司13局長工作一日,近距離體驗高官工作同政府運作;林太喺施政報告形容呢個計劃反應踴躍、評價正面,透露政府明年將擴大計劃規模,涵蓋更多高官,林太亦會參與其中,令學生都可以「與特首同行」。

相關字詞﹕袁莎妮 王維基

上 / 下一篇新聞