港聞

港聞二

下一篇
上一篇

消防新片 搵鄭萃雯教用AED機

【明報專訊】消防處近來積極推廣心肺復蘇法,以及教人用自動體外心臟去纖維性顫動機(AED機),早前同藝人羅蘭合作,喺8月推出咗一條短片,以rap形式教導正確心肺復蘇法手勢,片段出街後大受好評。消防處前日再推出新短片,搵到前新聞主播鄭萃雯同埋醫生回應坊間有關急救嘅疑慮,話只要「敢」就可以救到人。

「只要敢,跟住做,咪得囉」

新片段除咗再次教大家心肺復蘇法手勢之外,亦回應咗坊間一啲疑慮,包括「應否為避免法律責任而見死不救」、「救人會否傳染疾病」、「會否因未學過CPR訓練而搓斷病人肋骨」等。消防處醫務總監蕭粵中醫生講到,喺緊急情况下「出手救人絕對係合情合理」,仲語帶激動咁話,AED機係自動運作,「你淨係開機、貼Pad,跟住個聲音、圖案去做,咪得囉。其實我都唔知點解啲人呀,硬係咁樣見死不救」。

消防處向Emily透露,今次短片係想話畀大家知,即使市民無任何急救經驗,見到有人陷入危急情况,千祈唔好要猶豫,應第一時間用AED機並配合心外壓救人。

相關字詞﹕心肺復蘇法 急救 消防處

上 / 下一篇新聞