港聞

港聞二

下一篇
上一篇

嫻姐:講嘢刻薄者 咪畀入行會

【明報專訊】工聯會領導層上月底訪京,其間獲主管港澳事務嘅國務院副總理韓正接見,榮譽會長林淑儀、陳婉嫻,理事長黃國、會長吳秋北噚日同傳媒茶敘,黃國話有向韓正反映特區政府施政偏向商界,對勞工保障唔夠,希望中央推動特區政府令打工仔分享到經濟成果。嫻姐形容過去政府處理勞工問題態度「龜縮」,今屆政府好啲,例如處理強積金對冲、婦女產假增加至14周。佢呼籲政府應該有勇氣向商界「say no」,否則商界會貪得無厭。

籲政府有勇氣向商界Say no

嫻姐提到政府已經就取消強積金對冲補貼商界加碼,但有人仲話唔夠,又點名指廠商會會長吳宏斌早前話要將「銀行假」同「勞工假」睇齊,由17日減至12日。佢愈講愈㷫,認為政府應該有勇氣,講嘢尖酸刻薄嘅人就唔好搵佢入行政會議,雖然嫻姐無開名,但相信大家都估到佢講緊邊個喇。

韓正見工聯會時話,港人於內地嘅稅務安排將有好消息,林淑儀話佢哋爭取港人唔使雙重納稅,亦會向廣東省港澳辦跟進其他港人喺大灣區面對嘅問題。

相關字詞﹕勞工界 林鄭月娥 工聯會 陳婉嫻

上 / 下一篇新聞