港聞

港聞二

上一篇

唔怕電力不足 穩定發光 港生助肯尼亞人裝重力燈

【明報專訊】唔少大專生都會參加服務團,職業訓練局(VTC)學生發展學科今個暑假舉辦「8951的距離——『肯』港青年團」,11名學生去咗東非肯尼亞13日。學生了解當地人生活嘅同時亦協助佢哋改善環境,包括為佢哋安裝「重力燈」,喺電力供應不足下,都可以利用地心吸力推動齒輪產生電能,提供安全穩定嘅照明。

有份幫手嘅IVE(青衣)航空學高級文憑課程二年級學生李嘉駿解釋,「重力燈」設計簡單,只得幾條繩同幾個齒輪運作,但已能為居民帶來光亮環境。嘉駿喺旅程上亦留意到肯尼亞居民住所簡陋、衛生環境惡劣,甚至每日只能夠食一餐,令佢深深感受到幸福非必然;儘管如此,當地人仍然充滿希望,啟發嘉駿要更獨立同成熟。

IVE(沙田)幼兒教育高級文憑課程畢業生黃慧嫻就憶述,義工團一到埗就有一班小朋友蜂擁而至,相當熱情親切,佢就運用課堂所學,包括以動作、聲線同語氣,加埋用手指公仔道具,為當地兒童講古仔。黃同學仲話同小朋友相處啟發咗佢教育應該以興趣為主導,等小朋友有機會多親近大自然。

相關字詞﹕職業訓練局 肯亞

上 / 下一篇新聞