港聞

港聞二

下一篇
上一篇

撐大型基建非大白象 張建宗「翻港鐵舊帳」

【明報專訊】大型基建不時被批評為「大白象」工程,被部分人極力反對,政務司長張建宗噚日就喺網誌回顧多個上世紀竣工嘅項目,強調投資基建等於投資未來,呼籲大家要「站得高,看得遠」,又話「今天回首一看,事實勝於雄辯」。佢表明香港要有可持續未來,政府必須大力投資基建項目,甚至預計未來10年總投資超過1萬億元。

料未來10年投資1萬億

張建宗舉例,1970年代起地鐵時,部分人質疑有無必要同係咪安全,時至今日港鐵每日有超過530萬人次乘搭;赤鱲角機場啟用20年,航空貨運量連續8年全球第一,國際客運量全球第三;連接嘅青馬大橋亦成為香港地標之一。佢強調香港基建項目獲廣泛認同,部分更享譽國際,成果得來不易。

張建宗話,過去10年,政府投資基建由每年200幾億升至今個年度約856億元,預計未來5年每年整體建造工程量會維持喺2500億至3000億元,包括機場第三條跑道、中九龍幹線同醫院發展計劃等,「前人種樹,後人乘涼」,政府會繼續喺基建項目適度投放資源。

相關字詞﹕張建宗 大型基建

上 / 下一篇新聞