港聞

港聞二

下一篇
上一篇

唔想深入理解港教育制度 仔女讀國際校 楊潤雄:因為懶

【明報專訊】教育局長楊潤雄(Kevin)作為香港教育界之首,佢嘅仔女就讀國際學校,原來係因為佢懶。Kevin噚日喺港台節目《舊日的足跡》度話,香港教育制度較複雜,當年喺澳洲回流時,見仔女都喺外國返過吓學,就送咗佢哋去國際學校讀書,話係「懶啲」揀咗個簡單方法,自嘲係唔想「深入理解」香港教育制度。

至於送仔女去外國讀大學,佢解釋係因為一對仔女考慮到讀嘅科目唔係咁易喺香港嘅大學搵得到,佢哋分別主修獸醫同化學工程。

喺香港土生土長嘅Kevin細個時又係咩學生嚟呢?佢喺節目話,讀小學時通常都因為多嘴畀老師話甚至體罰,曾被記過。佢又喺facebook分享咗張讀九龍華仁中學時嘅班相,但似乎無咩人認得出學生時代嘅佢。

分享九龍華仁舊相

香港學生讀書壓力大,Kevin話諗返轉頭,同好多港生一樣,壓力就梗係有少少嘅,不過好記得阿媽話「盡咗力就得」,直到今日做局長都係不忘教誨。主持人車淑梅喺節目大讚局長,話聽到好多人對佢評語「相當唔錯」,要恭喜佢。Kevin笑言民望有上有落,一時時啦,好似教科書用語爭議嗰排,民望就插水式咁跌到尾二。佢話民望好似考試,成績(民望)愈高梗係愈好,但結果係咁都無辦法,不過都會反省點做好啲。

相關字詞﹕教育局 九龍華仁書院 楊潤雄

上 / 下一篇新聞