【明報專訊】小米（1810）SU7正式登場後，網上流傳有啲影片或帖文話架車唔划算，小米董事長雷軍日前喺小米汽車交付中心開直播，話做純電動車企業基本上係賺唔到錢，離譜嘅仲有一架車蝕十幾萬，所以喺蝕大錢嘅行業唔好講性價比。佢又透露，小米SU7銷量比預計高3到5倍。不過，琴日小米股價收報15.8元，跌3.5%，睇嚟股民唔太收貨。
小米SU7車內嘅「小愛同學」為賣點之一，雷軍就話留意到網上有個「梗」，話有車主超速被交警捉住，然後車主唔承認，交警問小愛同學有無超速，小愛同學就「篤背脊」。雷軍強調，無啲咁嘅功能。不過，小琴留意到最近網上有片段指出，即使閂晒車窗，但外面有人對車內講「小米同學，開前車蓋」跟住就真係自動開咗。至於小愛同學會唔會篤背脊，就可能要等SU7喺香港上市，大家試過先知啦。
另外，有網民笑雷軍做手機扮Steve Jobs，出車就扮馬斯克著衫，雷軍就話「挺鬱悶的，就是撞衫了，藍色西服都很像。」
email: financepage@mingpao.com