【明報專訊】近年鄭氏家族不斷着手整理旗下上市公司圖「擦靚招牌」，今年已經95周年的周大福（1929）亦有新搞作，公司宣布為咗迎接2029年百年華誕，將全面革新零售業務，並計劃喺未來5年策略性翻新旗下所有門店。當中作為周大福大本營嘅香港新形象門店，將於今年第三季於皇后大道中黃金零售地段開幕，佔地面積約2880方呎，有望為淡靜嘅市道增添生氣。至於設於上海嘅新店為集團喺內地首家旗艦店，樓高5層，佔地約8600方呎，預計2025年初開幕。
除咗翻新，周大福更推出面向消費者嘅全新品牌標誌，全新企業及品牌網站亦分別面世。集團相信，新品牌網站憑藉更完善功能同精簡設計，能為顧客帶來更流暢嘅購物體驗，充分體現集團對顧客滿意度嘅重視，亦符合品牌願景。
此外，周大福將於今年9月公布各項可持續發展目標及落實路線圖，為環境及其營運所在社區帶來正面貢獻。集團可持續發展方針將體現於一系列措施，包括加強循環再用、減少排放、維護生物多樣性等，引領珠寶行業邁向可持續發展。