【明報專訊】近年虛擬貨幣市場愈炒愈熱，其中行業龍頭比特幣上個月就升穿咗6.8萬美元高位，之不過比特幣創辦人「中本聰」身分一直成疑。Tesla（美：TSLA）創辦人馬斯克（Elon Musk）不嬲都係比特幣嘅擁躉，而佢噚日就係一個Podcast提到對13年前、第一次提出比特幣概念嘅人物，好可能就係中本聰真身。馬斯克懷疑，中本聰嘅真身可能就係電腦科學家尼克薩博（Nick Szabo），事關佢喺1998年已經提出咗一種去中心化嘅數字貨幣「比特黃金（Bit Gold）」，並獲廣泛視為比特幣始祖。馬斯克仲話，薩博自稱唔係中本聰，雖然唔肯定佢講嘅堅定流，但似乎佢真係比特幣理念嘅最大推動者。查實坊間亦流傳，「中本聰」根本唔係單指一個人；之不過，倘若作為一個比特幣炒家，今時今日馬斯克（同佢個Twitter帳戶）可能仲重要過中本聰𠻹！
