團結基金廣告累事 希瑪出通告護董事

【明報專訊】本港眼科醫生李佑榮上個月初被醫委會譴責專業失德，佢師父兼老闆林順潮創辦嘅希瑪眼科（3309）噚日出通告力保，話事件唔涉及欺詐或誠信問題，亦唔影響公司，李佑榮繼續適合擔任執董同埋喺公司執業。事件有乜因由？原來係因為團結香港基金。話說2018年團結基金請佢做演講嘉賓，但又冇話畀佢知會落廣告，又冇問清楚佢正確職銜，就喺廣告度稱呼佢做「視網膜和黃斑點手術專家」，結果搞到李佑榮因為涉嫌「未有採取合適措施避免有關名稱被引用」，被控專業失德。