【明報專訊】每年4月30日係「國際沒有巴掌日」，呼籲家長停止體罰管教子女，以《年少日記》獲頒金馬獎最佳新導演獎和金像獎新晉導演獎嘅卓亦謙（圓圖），同戲中演員黃梓樂最近就拍攝訪問短片，支持香港救助兒童會製作嘅防止虐兒短片The Sound of Violence。
提《年少日記》拍攝保護演員措施
卓亦謙提到拍攝《年少日記》時，由構思劇本到拍攝家暴鏡頭時，「真係見到個畫面呈現眼前，內心都覺得驚，好想快啲拍完」。佢話，拍攝時最重要係戲中被虐待嘅小演員係咪感覺安全，除咗避免真打，佢都同小演員及其媽媽講明有任何驚慌都唔好拍。
佢又覺得社會願意討論虐兒問題係好事，但因為類似事件比想像中多，令佢覺得「心情好複雜」；又話社會好多時候追求成績，而忽略內心感受先係最重要。
救助兒童會引述社署資料話，去年錄得1457宗虐兒個案，較3年前多50%，逾半施虐者係受害者父母，總幹事司徒恩冀望香港全面立法禁止任何形式嘅體罰，同加快就強制舉報虐兒條例立法。