【明報專訊】早前有報道引述有資深議員指選委界別謝偉俊（Paul）與當今議會「格格不入」，Paul噚日喺立法會辯論《財政預算案》發言時主動提及事件，「當然得啖笑啦，與其話格格不入，定『格格都入』好呢？」Paul又話，留意到議會上好多發言、做法比較係「格格都入」，「但對社會有咩好處？」佢認為，當市民認為議會同佢無關，唔想聽議員講嘢，甚至變得漠不關心、「躺平」的話，立法會喺社會上無咗關聯，就幫唔到政府手。
稱引資吸才不外乎憑「三心」
Paul不止一次公開講過，政府應重視「民心」，佢噚日就預算案發言時，提到有評論話要「聚人」、「聚財」才財來有方，而佢認為，無論想吸引中外資金、人才，定係留住本土人才，不外乎要予人信心、開心同安心。
指如邊盼吸客邊「戰狼式」趕客等於白做
佢提到，雖然治亂世用重典下，有時需要矯枉過正，甚至針對某些社會情况通過較「重」嘅法典，但用咗霹靂手段後都要用番「菩薩心腸」，令大眾可以安心、對社會有信心，並強調「攻心」工作做不足，無論做幾多事都好，如政府大力推動旅遊、盛事等，一方面希望吸引遊客，但同時不斷「戰狼式」趕客，就等於「白做」。