【明報專訊】迪士尼首次同協康會推出兒童社會適應訓練嘅先導計劃，喺樂園內為特殊教育需要（SEN）兒童提供實景訓練，發展基本社交技能。先導計劃為期一年，每月辦一次訓練，每次邀請約25個SEN兒童家庭，佢哋會喺迪士尼義工同協康會社工陪同下體驗學習。
每月一次 每次25家庭
訓練項目涵蓋迪士尼獨有嘅體驗活動，包括先喺動畫教室做活動簡介、學習畫迪士尼角色，之後到商店購物付款、喺餐廳點餐，兒童從中學習社交禮儀同溝通技巧，建立正確嘅行為模式。協康會話SEN小朋友，尤其係自閉症嘅，可能因為陌生環境、唔熟悉社區活動流程，容易誘發情緒同哭鬧，社區適應訓練就幫到佢哋預知流程，更易融入社區生活。
今年7歲嘅允妍患自閉症，外出易感焦慮，又會對等候時間長嘅活動缺乏耐性，但經過持續訓練，情况已改善。允妍媽媽話好開心見到阿女嘗試自行購物付款，甚至捧餐，覺得好欣慰。她仲提到，允妍活動前一晚好期待，自動自覺收拾書包，仲帶埋心愛嘅毛公仔。