【明報專訊】西貢區議會嘅提振地區經濟工作小組，係18區區議會中最遲開首次會議嘅一個，小組今日開會討論日夜都繽紛活動「西貢天后寶誕廟會」。據區議會文件，活動有粵劇神功戲、龍獅麒麟匯演、廟會美食及文化市集、天后誕展覽等。Emily見到小組除咗喺Instagram同facebook宣傳，仲打算透過內地小紅書，同埋民政處嘅聯絡網，例如佢哋嘅WhatsApp群組宣傳活動。
文件話廟會喺5月23至27日一連5日舉行，估計每日吸引超過3000人次入西貢，整個活動就吸引約2萬多嘅人次參與，又話今次廟會市集規模擴大，攤檔總數由以往超過50個增至100個。市集分為3類，包括賣傳統小食、廟會風車等嘅傳統廟會市集，賣各式手工藝品嘅文化及生活市集，同埋賣水晶首飾及擺設等嘅文青市集。
另外，活動亦邀請區內商戶同食肆提供優惠，喺商戶消費亦可獲每日限量派發嘅禮品換領券，港鐵旗下嘅Popcorn、連理街、康城商場亦有優惠，只要下載港鐵App同掃QR code，消費滿500元就可以減100元。