【明報專訊】今日（4月22日）係世界地球日，今年主題同減少塑膠有關，唔少機構都喺地球日前夕宣傳佢哋嘅綠色友善措施。政府今日起實施管制即棄塑膠餐具嘅安排，海洋公園及水上樂園就話，今日起停止於餐廳和小食亭提供即棄塑膠產品，改為使用蔗渣製飲管同竹製餐具。海洋公園搵埋一眾明星動物做大使宣傳，其中大熊貓盈盈「擁抱」地球形狀冰球，一邊享用竹葉。
啟德體育園介紹綠色設計
另邊廂嘅啟德體育園，工程預計2025年上半年啟用。體育園都喺地球日前夕講園區綠色設計，話會推動體育園成為具有低碳環保概念嘅場館；又話園區綠化率逾30%，種植超過1000棵樹，唔少係本地原生植物；園區建築物採用先進嘅通風系統和綠色設計，可改善空氣質量並減少碳排放，所有私家車泊位均設有電動車充電設施。園區超過10%嘅屋頂區域覆蓋太陽能板，用作提供熱水和電力，預期每年可減低最少1%嘅建築物能源使用量。所有場館設雨水收集系統，回收嘅雨水經處理後能滿足各場館約25%嘅灌溉需求。