【明報專訊】《2023年產品環保責任（修訂）條例草案》下星期一（22日）實施首階段，禁止商家提供或銷售即棄發泡膠及塑膠餐具。本地環保社企ReCube話，當日起會同中大校園內6間餐廳合作，中大學生及教職員買外賣時，可透過應用程式免費借用重用餐盒同杯，用完唔使清洗，直接歸還到任何一間同佢哋合作嘅餐廳就得，仲可以賺積分換餐飲獎賞。
歸還唔使洗 仲可儲分
身為中大校友嘅ReCube聯合創辦人賴瑞芳認為，唔少人覺得環保好麻煩，希望藉此話畀大家知重用餐具都可以好簡單，唔需要帶盒同埋清洗，仲可以慳到外賣附加費同賺獎賞。
連同中大校園餐廳，同ReCube合作嘅食肆有32間，包括學校飯堂、酒店、連鎖餐飲集團等。另一聯合創辦人徐嘉熹話，部分合作餐廳已經開始提供租借餐具服務，其餘合作餐廳將喺今個月底至下個月陸續開始，而去年成立嘅ReCube至前日為止，已借出重用餐具超過6400次。