【明報專訊】東九文化中心下周一起會多一個新設施向公眾開放，就係位於地下嘅室內空間「展隅」，到時並會舉辦沉浸式互動體驗「環遊角落」，由藝團XRT策劃，透過科技展現東九龍昔日面貌。觀塘區議員、立法會九龍東議員等噚日去參觀，其中民建聯顏汶羽話，見到舊屋邨、大牌檔、小販叫賣等影像重現，令佢諗起細個喺牛頭角成長嘅回憶。
顏汶羽話，東九文化中心不但係一個新地標、新打卡點，對居民更別具意義，因為以往區內舉辦較大型文娛活動要依賴牛池灣文娛中心，甚至跨區到九龍城嘅高山劇場，東九文化中心明年就可畀街坊近近哋欣賞到更多專業文娛節目。一齊去參觀嘅立法會議員鄧家彪就話，東九文化中心除咗有LED花海可打卡，仲有呢個「環遊角落」，但就提醒想睇要先預約。呢項體驗環節全長約30分鐘，不設中場休息，詳情瀏覽網址（www.ekcc.hk/around_the_corner/tc/prog.html）。
相關字詞﹕東九文化中心