【明報專訊】垃圾徵費延後至8月1日實施，環保署官員早前向市民解說呢項政策時，解答咗唔少疑問，亦引起過社會討論，包括助理署長胡勁欣（圖）提出嘅地拖棍論，「可以鋸開佢兩嚿放入指定袋」嘅說法就被立法會議員批評不切實際。噚日有網民喺討論區發文，話翻查網上政府電話簿嘅時候發現，呢名環保署官員嘅職位，由早前嘅助理署長變咗首席環保主任，懷疑佢係咪因為垃圾徵費言論被「降職」。
Emily翻查政府電話簿，發現胡勁欣現時嘅職位係首席環保主任（資源回收），屬於環保署廢物管理科資源回收組，而佢之前個職位屬於都市固體廢物收費政策科，現時嘅助理署長由吳文裕出任。
綜合多方消息，胡勁欣早前署任嘅助理署長（都市固體廢物收費），本身由政務主任出任，而胡勁欣並唔係政務主任，所以只係暫時署任，而自從環境及生態局改組後，呢個職位一度懸空，所以安排由胡勁欣署任助理署長一職，直至最近完成署任工作，先至重返原來嘅首席環保主任職級。