【明報專訊】呢幾日唔少紀律部隊搞開放日，宣傳4．15全民國家安全教育日。政務司長陳國基噚日同「共創明『Teen』計劃」嘅學員去咗海關學院嘅開放日，活動除咗介紹海關工作，仲有「美食街」設茶點招待賓客，食品包括「國安奶茶」，以及印上「國安」、 「家安」字樣嘅「國安平安包」，個包拳頭咁大，陳國基大讚有心思。
講開「共創明『Teen』計劃」，陳國基話上周五晚喺官邸舉辦咗一場「共創明『Teen』計劃」酒會，但今次活動係無學員學生參加，而主角係支持計劃嘅mentors友師及義工。陳國基話，如果無佢哋嘅支持，用心用力陪伴參與學員，計劃係搞唔成，又話有一名友師對佢哋講，學員被診斷為有特殊教育需要（SEN），而友師為咗與學員溝通得更好，去修讀咗一個與SEN有關嘅課程，喺經過專業訓練下，友師終於打開學員心扉，雙方建立關係，大家聽到呢件事都覺得好感動。