【明報專訊】近日引起熱話嘅facebook群組「全港店舖執笠結業消息關注組」，以分享商店結業消息為主，但自稱版主嘅「Neighbor」噚日宣布關注組「執笠」，有成員慨嘆「香港經濟真係好差，連執笠關注組都要執笠」。版主形容「執笠」好港式，結業唔代表唔可以重開，形容關注組只係裝修改名，本月23日將以新名「全港店鋪（舖）消息關注組」重啟業務。
話有人指「唱衰」
版主：盼改名有正能量
截至噚晚，群組有超過31.8萬成員，版主發現好多成員分享嘅內容都離題，變咗探討點解某店會結業，或交代個人唔出街消費嘅原因。版主又留意到，群組惹嚟好多人攻擊，有人話關注組嘅名稱「唱衰香港嘅人」，甚至將本港經濟差「怪責」呢個群組。雖然版主話無法獨力救到香港經濟，但考慮到群組都有社會責任，期望改名將負評轉化成正能量，令群組運作可持續發展。
版主否認群組「變質」，話改名後嘅群組，不論係小店、大集團開舖或結業等有關香港實體經濟及消費嘅睇法都歡迎討論。佢又話會另開新群組，方便只關注結業消息嘅成員分享資訊。