【明報專訊】原定上月喺香港成立家族辦公室嘅「迪拜王子」Sheikh Ali Al Maktoum，近日有唔少討論質疑佢嘅背景。喺網上輿論發酵前，恒生大學校長何順文上月26日頒授證書，委任「王子」做恒大榮譽教授，仲同王子私人辦公室簽合作備忘錄（MoU），話透過王子嘅捐獻同贊助，畀恒大亞太東盟綠色政策中心做研究及發展。不過校方近日「更新」咗新聞稿，文中只介紹恒大亞太東盟綠色政策中心開幕，發稿時間就維持係上月26日。
舊版新聞稿有7處提到「王子」，如「Sheikh Ali Al Maktoum王子私人辦公室」，新版本唔止無再咁稱呼佢，連佢個名都無提。恒大噚晚回覆Emily，話恒大同對方簽MoU、委任佢做榮譽教授都係經既定程序，兩者已生效，中心亦開始運作，但回覆就無再用「王子」兩字。
睇番恒大校網，榮譽教授名單暫只見4人，包括諾貝爾文學獎得主高行健、已故國學大師饒宗頤等人，無王子個名。