【明報專訊】活化項目「油街實現」又有視覺藝術展覽睇，今次邀請咗3個藝術家用數碼科技同物料裝置做媒介，畀觀眾體驗遊走現實同虛擬世界。今日先推出《幻石》同《謐‧衝》（圖）兩個作品，其中後者由本地電子音樂人兼多媒體藝術家蔡世豪（圖中人）創作。蔡世豪擅長結合音樂同影像，拉闊觀眾對時間、地緣同空間嘅聯想。今次佢將以前嘅遊艇倉庫作為展覽空間，喺室內投映360度嘅海灘場景、急速稠密嘅都市影像，配上海浪聲，再加上電子音樂嘅節拍，將大自然同都市融合，打造一個獨特嘅空間。
