【Emily】禁毒展館下周重開 設互動裝置「毒顏相機」

【明報專訊】舊年2月開始翻新、全港首個以禁毒教育為主題嘅常設展覽館「香港賽馬會禁毒資訊天地」，噚日舉行重啟典禮，將於下周一重新開放畀公眾免費參觀。翻新後嘅展館設有多個互動多媒體設施同裝置，希望加深市民對毒品嘅認識，例如畀市民透過揀唔同嘅毒品濾鏡，包括大麻、冰毒、搖頭丸等，「體驗」吸食毒品後對面部禍害嘅「毒顏相機」；亦有「毒品X光機」，市民只要掃描唔同毒品，屏幕就會顯示嗰款毒品對身體嘅禍害。