【Emily】環境局長參觀電動九巴 睇埋數散銀

【明報專訊】巴士公司引入新能源巴士，環境及生態局長謝展寰（後排右二白口罩）噚日就去咗九巴九龍灣車廠參觀，除咗了解新一代電動單層巴士嘅運作，仲深入後勤地帶嘅數錢重地。𠵱家大部分人搭巴士會用八達通，但都仍有人入散銀，見到員工喺一個個錢箱倒硬幣出嚟分類，都幾有復古感覺。謝展寰話，政府已喺《香港氣候行動藍圖2050》中訂出喺2050年前實現碳中和目標，並喺新一份施政報告提出喺2027年底前投入約700架電動巴士。