【Emily】「黃水」波及十四鄉、愉田苑 麥潤培：利安洗水缸後好轉

【明報專訊】馬鞍山近日食水變黃，水務署話係錳含量稍高所致，原因係馬鞍山濾水廠降錳程序不穩定，但強調食水安全。鄰近嘅西沙路十四鄉村屋同沙田愉田苑都有居民反映食水呈黃色，Emily向水務署跟進，署方回覆透露，原來馬鞍山濾水廠供水範圍除涉及馬鞍山一帶，鄰近嘅十四鄉、石門、圓洲角及小瀝源等都包埋。跟進事件嘅沙田區議會主席、利安區議員麥潤培噚日話，佢嗰區放水和清洗水缸後，食水顏色好咗好多。