【Emily】黨慶酒會笠高帽 李家超感謝民記育才

【明報專訊】民建聯噚日喺灣仔會展舉行30周年黨慶酒會，新任特首李家超及一眾司局長都有出席，李家超致辭時頻頻向民建聯笠高帽，大讚民建聯現有4萬幾名會員成績輝煌，仲形容自己係「民建聯嘅得益者」，有譚耀宗做過佢競選辦主任，現屆立法會又有18名民記議員。連同早前退黨嘅副律政司長張國鈞，今屆政府司局長同政治助理有6人都來自民建聯，李家超話好感謝民建聯為佢培育人才。