【明報專訊】你方唱罷我登場，候任特首李家超新班子前日公布，現屆政府任期進入最後倒數。外界形容特首林鄭月娥班底喺新班子近乎「清零」，5年前獲林太提拔、由機電工程署長升任運輸及房屋局長嘅陳帆亦「冇得留低」。林太同陳帆噚日參觀元朗過渡房屋項目「博愛江夏圍村」，就主動提到呢次係同陳帆最後一次一齊出席公開活動，佢讚對方喺任內竭盡所能，任勞任怨，又話運房局將會分拆成兩個局，一個係運輸及物流局，一個係房屋局，就證明咗陳帆過去5年一直係一人肩負兩個局長職位。
