【明報專訊】中大政治與行政學系高級講師蔡子強（蔡子）計劃今年退休，「香港01」先後兩日刊登其專訪，文中提到蔡子對現時社會環境意興闌珊，認為係時候交棒畀下一代，又講到過去10多年香港政治生態由激進力量主導，未學懂「進退有道」，指香港民主運動30年一事無成。訪問引來政界反響，同係時事評論員嘅香港民研副行政總裁鍾劍華講到，佢唔係操持權柄嘅人，無交棒唔交棒，只要愛護香港社會，希望香港社會進步，佢哋都無選擇，仲寄語「子強兄」：「理想被粉碎的，何獨年輕人，還有你我那個世代！盼望你不要意興闌珊！香港變得陌生，正因為失去了很多熟悉的聲音！」佢勸蔡子「請繼續做你一直在做的事」。
