【明報專訊】職工盟早前啟動解散程序，下月3日召開特別會員大會表決。工聯會社區幹事黃遠康噚日搭港鐵時，發現港鐵車廂電子資訊屏上，顯示咗「工聯會啟動解散 稱將課程影響減到最低」呢則「新聞」（圖），令佢好驚訝，佢喺facebook出帖反問：「究竟水平幾低嘅媒體先會搞錯『工聯會』同『職工盟』？」仲加上標籤「假新聞」。佢喺帖文又話，「工聯會愛國愛港，坐擁42萬會員，非常穩健，唔會解散！只有作賊心虛嘅偽勞工團體先要解散保平安」，要求向港鐵提供呢則新聞嘅商台澄清同道歉。
