【明報專訊】政界不時話財政司長陳茂波有意選下屆特首，噚日公布嘅《財政預算案》被視為特首選舉正式開跑前嘅「功課」。陳茂波打咗綠色領呔同財案封面襯色，喺立法會宣讀預算案，喺結語提到「家」，話喺家入面要相互接納、支持；仲講到深層次矛盾，「結無論綁得多緊，總有解開的方法。讓時間給我們解決問題的空間」。佢喺記者會、電視論壇都被追問係咪想做解結人、打算選特首，陳茂波無正面回應；問佢「愛唔愛黨」，都一樣冇直接講愛定唔愛。
