【明報專訊】下星期五係聖誕佳節，學生組織「賢學思政」噚日喺旺角徵收物資，又呼籲大家寫信畀在囚及還押者，話希望「盡綿薄之力為牆內手足送上一點温暖」。噚日下晝有唔少人拎住四出蒐羅嘅物資，包括按懲教署「認可交來物品」指引嘅朱古力、香葱薄餅、豬肉乾、魷魚絲等去街站，幾十個紅白藍膠袋，好快就裝滿晒，組織亦喺facebook話收到嘅物資已超出佢哋負荷，之後會再開街站接收。除咗送物資，亦有市民企喺街畫畫寫卡，希望送上鼓勵。
