【明報專訊】政府明年會做大型人口普查，財政司長陳茂波噚日喺網誌同facebook上載短片，講近日到訪政府統計處總部。佢喺片中話自己同統計處都有淵源，原來佢喺1971年嘅中四暑假兼職做過人口普查統計員，當年財爺仲好勇敢，自告奮勇陪女同事到一啲人流比較雜嘅地方做訪問。點知到真係做訪問時，財爺就畀人「劏死牛」用武器指嚇，「所以好瘀呀，記到𠵱家」；一旁嘅統計處職員回應話「哎呀……司長你真係唔好彩喇」，補充統計員自2016年起全面「行孖咇」，以策安全。 相關字詞﹕人口普查 政府統計處 陳茂波
