【明報專訊】疫情嚴峻，社會活動接近停擺，港大醫學院院長梁卓偉最近接受馬會《駿步人生》訪問，提到疫情下亦要調整生活，以往佢會去健身室做運動，𠵱家只能每日行樓梯；又話每星期雖然只買一次餸，但菜、肉、魚統統買齊，當成「舉鐵」訓練，提醒港人面對持續超過半年嘅疫情，要做到身心健康，就要識苦中作樂，仲要發揮「阿Q精神」，而佢自己早就練成咗呢門技能，識得挖苦自己，苦嘅時候搵朋友傾訴，開心嘅時候唔好太得意忘形，佢話香港人喺呢方面係好強嘅。
