【Emily】掛大型廣告牌 張國鈞話無關選舉

【明報專訊】Emily噚日路經銅鑼灣崇光百貨附近，發現有大廈外懸掛咗民建聯張國鈞（Horace）嘅超大型廣告牌，印有「拒絕攬炒」、「重建家園」字眼（圖）。係咪因為選舉臨近要宣傳？Horace同Emily講廣告牌無關選舉，強調過去幾個月民建聯主軸都係宣傳拒絕攬炒，又透露因疫情關係，廣告位相對易搵，價錢亦合理。不過，Emily行過望到都有少少心驚膽跳，驚個牌跌落嚟；Horace就話個牌入咗則，check過相信係合法同安全，強調搵廣告商時都有睇晒證明書，唔敢亂嚟喎。