【明報專訊】立法會選舉9月舉行，除咗直選，泛民亦有意搶攻功能組別，其中工程界就有淺黃素人考慮出戰，講緊嘅係土木工程師黃偉信（Wilson），正積極考慮參選，挑戰現任議員、經民聯主席盧偉國。不過，Wilson向Emily承認，要挑戰呢個界別絕對唔容易，阻滯之一原來因為佢太後生！Wilson透露，界別選民平均年齡係55歲，加上工程界相當論資排輩，要說服50幾歲嘅前輩投票畀佢呢個37歲嘅「後生仔」，都實在有障礙。
