【Emily】劉小麗宣布唔參選立會

【明報專訊】立法會前議員劉小麗2016年因宣誓風波被DQ，2018年參加九龍西立法會補選時，又畀選舉主任DQ、裁定提名無效。已加入工黨嘅劉小麗，之前亦有參與民主派喺九龍西嘅協調，大家亦注視佢如果再參選入唔入到閘。不過佢噚日凌晨宣布，已決定唔會參選今屆立法會選舉。除咗劉小麗，油尖旺區議員李傲然、公民黨余德寶早前亦已宣布唔會參選，睇嚟九西嘅泛民協調漸趨明朗。