【Emily】消防處長周六卸任 難忘當年防護服似雨褸

【明報專訊】服務咗37年嘅消防處長李建日（圖）星期六退下火線，由副處長梁偉雄接任。李建日噚日同傳媒分享難忘救火往事，原來佢初出學堂就參與1984年香港仔大生工業大廈焚燒68個鐘嘅5級大火，佢話當年裝備無咁好，闖入火場只著住「基本上係防水、好似雨褸」嘅防護服，用呼吸器大力呼吸時仲會吸到濃煙。當年佢同隊友接力救火，每次出番嚟都黑晒，「最白係眼珠同牙齒」。