【Emily】羅致光拍片邊讚外傭邊提勿聚集

【明報專訊】「限聚令」禁止多於4人喺公眾地方聚集，但仍有外傭喺公眾地方聚會。勞工及福利局長羅致光噚日拍片感謝外傭對香港社會嘅貢獻，話好明白外傭希望喺休息日同朋友見面，但現時處於抗疫重要時刻，有必要保持社交距離，防止疫情擴散。勞福局嘅短片製作咗菲律賓文、印尼文同泰文3種字幕，亦會同總領事館合作，經佢哋嘅網頁及社交媒體平台向其國民傳遞相關信息。