【明報專訊】港島東醫院聯網總監陸志聰噚日同大家介紹醫院新開嘅二線隔離病房。有眼利行家發現陸醫生戴住條心心花紋呔（圖），組成心心圖案嘅線條原來係英文字母，夾埋係粗口字。Emily問過陸醫生條呔做咩咁鬼馬，佢笑笑口話條呔係朋友送嘅，戴咗幾年，好鍾意，一直唔知道暗藏玄機。佢話噚日襯埋粉紅色恤衫，都係想派吓「心心」畀記者行家，又讚發現玄機嘅攝影記者眼利，「可能我要搵眼科醫生驗吓眼」。佢話之後都會繼續用，但就會避免喺公眾場合戴。
