【Emily】派口罩混亂腰斬 區議員回應不滿者：未來唔好投我票

【明報專訊】唔少區議員近日四出蒐羅口罩派畀街坊，但僧多粥少，有區議員派口罩時引起混亂被批評。東區區議員吳卓燁前日喺區內派口罩，但被指安排不善，令一眾街坊要好似賽跑咁飛奔去排隊，有老人家因此整親；最後更因場面混亂而腰斬唔派口罩。吳卓燁喺facebook致歉，但好有霸氣咁反駁不滿者，話如果有街坊不滿，未來「千萬唔好投我一票」，亦叫不滿佢嘅人要有骨氣，唔好拎佢派嘅嘢，去建制派政黨攞。