【明報專訊】DSE開考了，5萬青年學子上試場，為大學學位拼搏。這場DSE不單牽動5萬個考生的心，也牽動10萬個望子成龍的期望。因為B仔C女已是過了海的神仙，王師奶得以旁觀者的角度看今年DSE考試。家長們心情緊張忐忑兼而有之，但小婦人就好替考生們開心，因為今年考生人數歷年最低，考生人數減少，大學學位數目不變，即係話入大學機會多咗。更好消息在後頭，預計明年考生比今年更少，恭喜明年考DSE的同學仔，你們上榜的機會更高。政府數據話後年考生人數回升，王師奶不作如是想，政府呢鋪一定買大開小。數字是死的，人對腳是活的，兩年時間流流長，估計將會有不少學生由中三開始「較腳」去外國升學。DSE考生數字不會回升，只會滾水淥豬腸，愈淥愈縮。每年DSE放榜，小婦人總有幾日心翳翳，睇住數以萬計的年輕人入唔到大學，頭耷耷，眼濕濕，抬唔起頭，好似世界末日。呢個世界唔應該咁灰，大好青年前途就此止步？唔好啩。
