【明報專訊】香港教育立立亂，一陣話學生跳樓，一陣又全城討論南京大屠殺影片，一陣又話學生移民、阿sir較腳。教育局宣布好多學校開唔夠班，寺多和尚少，預測情况愈來愈差，仲自我示範，將小貓三四隻的官校摺埋。官、津、直資齊齊嗌救命，私校更加苦不堪言，橫額直幡加上facebook日日吹噓都無用。學生來源少，如來佛祖、王母娘娘都救你唔到。王師奶暫時替住廟街盲公陳，鐵口批命，香港學校將有一埸大兜亂，塘水滾塘魚。排名頂尖的官津直資學校不愁缺少生源，一切由低炒起，Band 3升Band 2，Band 2升Band 1。學校雖無列明banding，家長們心中有數，邊個係一哥，邊個係散仔，分得清清楚楚，你驚官校皇仁、津校喇沙、直資聖保羅男女唔夠學生乎？
