【明報專訊】資助小學嫌每校一外籍英語教師（NET Scheme）唔足夠，平均一班一星期冇一堂，紛紛以多聘外籍英語教師為由，向家長收取額外費用。其中一個名稱令王師奶擊節到五體投地，既體貼，又溫情。王師奶斗膽詳釋「增潤」兩字含義，主要解釋是「潤」字，連同潤字應用的詞一般有「潤澤」、「潤飾」，四字詞又有「溫潤如玉」。小婦人慣用草根語言，最貼切的相反意思可能是「糠」，「嚡」或「dry」。就因為糠、嚡、dry，所以要增潤，仲要收費𠻹。由唔夠外籍教師而聯想翩翩到「增潤」一詞，話佢咬文嚼字又得，話佢巧言令色玩嘢又得。
