【明報文章】最憎人扮熟用單字稱呼自己的阿嵐，有一晚，跟我聊到戲院重開，亞洲電影節即將揭幕，但其實我們都好怕電影節，不過原因有別。於我，入到戲院，有三種觀眾必須死，①玩電話，②郁身郁勢，有時仲要打開個袋摷嘢，③講嘢。一邊看戲一邊講嘢的賤嘴，都分好多種，青春少艾三五成群看到威嘩鬼叫是一種，跟一味扮豬看極都問點解的影伴深入討論劇情，是另一種，無辦法，香港地，小人多，但電影節遇到那種是最討厭的。阿嵐則相對簡單，她只是怕遇到熟人纏着自己打招呼。港女界滿島光的煩惱，恕我不得要領，通常都無人跟我打招呼，我亦很少跟人打招呼。呀，唔係喎，我猛然想起，幾乎每一晚睇戲都會撞見，而且都會跟我打招呼的人，是有的。
