【明報專訊】可能係唐家成腳頭好，港交所（0388）剛宣布委任佢做新主席，馬上有運行，北水連日掃貨，港交所股價噚日又升咗3.2%，唔經唔覺已經連升4日，累計升咗15%，相當於470億元市值。
唔知係咪見港交所升咗不少關係，電訊數碼（6033）昨日披露，收市後與匯豐簽訂一份股票累計認沽期權合約、名義金額約1292萬元，有關累計認沽期權合約掛鈎股票就是港交所，涉及43,676股，現貨價格為246.6元，行使價為295.846元，取消價格為234.27元，年期12 個月。簡單嚟講就係賭港交所股價會下跌。
翻查資料，似乎電訊數碼對港交所情有獨鍾，因為公司喺2022年中時同樣買咗3份港交所累計認沽期權合約，至於今次操作會唔會為公司帶來收入，小琴就拭目以待。
